TRÚ

                        Vér þurfum trú á mátt og megin

                        á manndóm, framtíð, starfsins guð,

                        þurfum að hleypa hratt á veginn,

                        hætta við víl og eymdarsuð.

                        Þurfum að minnast margra nauða,

                        svo móður svelli drótt af því,

                        þurfum að gleyma gömlum dauða,

                        og glæsta framtíð seilast í.

 

VÍSA

                                     Til náttmála stutt er að stíga,

                                     við ströndina hvíslar hljótt

                                      í brúðar skartklæðum bárudís

                                      og býður þér - góða nótt.

 

LITLA FLUGAN

Hún kom semma sumars og settist á borðið hjá mér, þar sem ég

var að skrifa. Ég varð að taka strax eftir henni, því annars var

hún óþolinmóð og átti til að fljúga upp á blaðið og ganga yfir

orðin, sem ég skrifaði seinast, og blekið var tæpast þurrt á.

Ég var vanur að gefa henni smá brauðmola með smjörklípu á,

og það kunni flugan að meta. Hún settist á brauðmolann, skók

lappirnar og hristi vængina eins og aðalatriðið væri að mýkja

útlimina í hálfbráðnu smjörinu.

Þegar flugan var að leika sér á brauðmolunum, fór ég venjulega

að skrifa og fékk til þess næði nokkra stund. En svo kom flugan

allt í einu, og flaug í hringi kringum höfuðið á mér með reiðilegu

suði. Hún hefur haldið, að ég væri búinn að gleyma sér.

Smátt og smátt vöndumst við hvort öðru, ég og litla flugan, og

daginn, sem hún lá liðin í gluggakistunni hjá mér, gat ég ekki

skrifað neitt, því ég saknaði félagsskaparins, og fannst ég orðinn

einmana. Svona getur lítil fluga orðið milkils virði.

 

VÍSA

                                Undir nætur værðar-væng

                                velt ég út af svona.

                                Mér hefur reidda mjúka sæng

                                mín hin góða kona.

 

ÆTTFAÐIR OKKAR ERLU BLOGGVINKONU OG FJÖLDA ANNARA

Peter Christian Buch var fæddur 1723, d. 23.1.1784, hann var átján

ára gamall sem verslunarþjónn við einokunnarverslunina. Síðan varð

hann forstöðumaður verslunarinnar í Hammerfest í 35 ár, eða 1745-1779.

Því starfi gegndi hann með sóma og varð það honum til hins mesta vegsauka.

Peter hafði forustu um nýjungar í atvinnuháttum í Hammerfest, efldi

fiskveiðar og bætti hafnaraðstöðu. Hann hafði einnig mikinn áhuga á

náttúru lands og sjávar og átti í miklum bréfaskriftum við Vísindafélagið

í Þrándheimi um þau mál. Hann sá atvinnumöguleika í öllu mögulegu,

perluveiðum, ullariðnaði, æðarfugli, íshafsveiðum, hvítref og kolavinnslu.

Þessi áhugi náði til Íslands. Hann sendi 30 hreindýr til Íslands á vegum

stjórnarinnar. Hann vildi ekki móttaka greiðslu fyrir þessi dýr en fékk í

staðinn medalíu frá konungi fyrir vikið. Peter átti nefnilega eyju þá er

Sörey heitir, sem er skammt frá landi við Hammerfest. Hann gaf Íslendingum

hreindýrin úr stofni þessarar eyju hans, þau sem voru talin laus við

sjúkdóma. Þessi hreindýr munu vera einn fyrsti hreyndýrastofnin sem

hér tórði. Telja má með réttu að Peter hafi verið einskonar faðir Hammerfest

sem kaupstaðar. Í Hammerfest er enn altarisbók flauelsdregin og silfurslegin

sem hann og kona hans gáfu kirkjunni. Peter varð tollstjóri í Kristiansand

og síðar meir stjórnarerindreki. Stutt var hann þó í þeim embættum og dó

í janúar 1784. Var hann þá orðin vel efnaður og eftir hann voru tæpir

sjöþúsund ríkisdalir.

Kona Peters var Anna María Elísabet Kraft Buch f.1725, d. 25.3.1801,

ætt hennar er hálfþýsk að uppruna og skeytir sig með fjölda frægra presta,

listamanna og vísindamanna. Má rekja hana aftur í aldir. María eins og hún

var kölluð lifði mann sinn lengi eða í 17 ár. Eftir fráfall hans undi hún ekki

fyrir sunnan. Hún tók saman föggur sínar og stefndi norður á Finnmörku,

til fornra heimabyggða, þótt leiðin væri hálfs annars þúsund kílómetra löng.

Hún stoppaði í Hammerfest og byggði sér veglegt slot við Ryperfjörð fyrir

það fé sem bóndi eftirlét henni. Bar það heitið Maríuborg.

Lést hún í höll sinni 1801.

Þau hjón voru foreldrar Nikulásar Buch f.1755, d.1805, sem var assistents

við Húsavíkurverslunina, tengdasonur Björns Thorlacíus kaupmanns þar.

Hann var meðal annars forfaðir minn og rúmlega níuþúsund annara

Íslendinga a.m.k. sem ég hef skráð hjá mér undanfarinn átta ár.

 

Hallgrímur Óli Helgason

 

SEXTÁN POTTAR

                           Í lífi og dauða meðan má

                           munninn bera að stútnum,

                           í sorg og gleði sýp ég á

                           sextán potta kútnum.

HLÆIÐ

                           Hlæið í gleði, hlæið í nauð,

                           hlæið í beiskum trega,

                           hlæið þið lífs og hlæið dauð,

                           hlæið þið eilíflega.

 

ÓÐUR ANDVARANS

                          Gráttu ekki góði minn,

                          gróa hér blóm í spori.

                          Það verða orðin önnur þín

                          ævikjör að vori.

LÁTTU MIG VERA

Nokkrir unglingar höfðu haft í frammi þann gráa leik að

hrekkja vangefinn jafnaldra á allan mögulegan hátt. Einkum hafði

einn drengur í hópnum lagt sig fram við hrekkina.

Þann dreng dreymdi síðar, að vangefni drengurinn kæmi til hans

og segði: ,,Láttu mig vera, nú er ég orðin jafn heill og þið’’.

Daginn eftir fréttist að drengurinn vangefni hefði látist í svefni,

en sá, sem dreymt hafði iðraðist sárlega illrar og gálausrar

framkomu sinnar.

FAÐIR/SONUR

                    Faðirinn:

                    Ég fékk mér nú dammara, drengurinn minn,

                    og dæmalaust var hann nú góður.

                    Þú veist ekki um stammara, strákurinn þinn,

                    og stendur svo rótlaus og hljóður.

   

                    Sonurinn:

                    Nú, ég er svo fullur ég finn engan veg,

                    og fari’ ég að snúast, þá hálsbrotna ég.