Gamlar vísur

 

Er í seli ágætt horf

Indriði telur sporin,

reynir þó að rista torf         um Indriða Kristjánsson í Skriðuseli

rekkum hjá á vorin.

 

Hellnaseli heldur við

hraustur geymir sverða,

Bjarni tyggur tóbakið        um Bjarna Bendiktsson í Hellnaseli

tannlítill að verða.

 

Ég á Sandi Friðjón finn

flestum þykir skæður,

að honum lítur hreppsnefndin      um Friðjón Jónsson á Sandi

hann því öllu ræður.

 

Ég úr núpnum ofan sný

óðum fækkar býlum,

Jakob hraustur hamast í           um Jakob Magnússon í Húsabakka

Húsabakkakýlum.

 

Sigurjón þar sér um bú

sonu á og dætur,

ofur hans er aðferð sú            um Sigurjón Friðjónsson á Sandi

aldrei skíra lætur.

 

kannast einhver við þessar vísur, og hver orti þær, fann þær í gamalli stílabók, skrifaðar eftir föður minn

Helga Ingófsson bónda í Húsabakka, þetta eru allt bændur í Aðaldal kringum aldamótin 1900.

 

Athugasemdir

[Gústi (IP-tala skráð) 17.3.2007 kl. 00:05]

Skemmtilegar vísur, það voru nú margir í sveitinni okkar á þessum árum sem áttu létt með að yrkja.  Hefur  þú einhvern grun um hver var þarna að verki ? Voru eh fleiri vísur í kompu pabba þíns. 

Kv Gústi 

[Hallgrímur Óli Helgason, 17.3.2007 kl. 10:58]

já Gústi það eru fleiri vísur um nokkra bændur í viðbót, s.s. Þorgrím í Nesi, Davíð á Knútsstöðum, Sigurjón í Hraunkoti, Pétur á Núpum, Sigmund í Árbót, Sigtrygg á Jarlsstöðum, Baldvin í Garði, Aðalstein í Haga og nokkra fleiri, ég veit ekki hver orti en var að vonast til að einhver vissi eitthvað um þessar vísur, mér datt í hug að Hreiðar Karlsson vissi kannske eitthvað en hef ekki haft samband við hann, eða kannske Indriði á Fjalli

Halli