ÝTTU NÚ

Á árunum fyrir seinna stríð var Holtavörðuheiði illfær á köflum

og lágu bílar í aurbleytu ef út af bar með veður. Eitt sinn var

vörubílstjóri einn á leið suður og festi hann svo illa bíl sinn á

miðheiðinni að honum tókst ekki með nokkrum ráðum að ná

honum upp.

Rann bílstjóranum þá mjög í skap og hugsaði með sér, að hann

skyldi nú reyna þegnskap heiðardraugsins, sem hann hafði oft

heyrt getið og sagði í fússi: ,,Ýttu nú ef þú ert einhvers nýtur’’.

Brá þá svo við að bíllinn hentist út úr aurnum og ók ökumaður

eftir það suður hindrunarlaust eins og leið lá. Sagði hann þetta vera

í eina sinnið, sem hann hefði leitað fulltingis eilífðarvera, en ekki

dytti sér í hug að neita tilveru þeirra eftir hjálp heiðardraugsins.

 

Athugasemdir

[Ásdís Sigurðardóttir, 26.5.2007 kl. 22:52]

Mér dettur nú bara afi Jónas Hagan í hug. Margar ferðirnar fór hann yfir heiðina í misjöfnu veðri og færð.

[Hallgrímur Óli Helgason, 26.5.2007 kl. 23:16]

já, kannske þetta hafi verið afi þinn Jónas Hagan, fann þessa sögu í gamalli bók sem heitir, Þjóðlegar sagnir.