BYLTA

Bróðir minn hefur verið að horfa á vestra mynd, hugsaði ég þegar

honum datt það snjallræði í hug að gera eins og aðalkallarnir voru

vanir að gera í bíómyndunum, að stökkva ofan af þaki eða úr glugga

og hesturinn þeirra beið tilbúinn, og hægt var að þeysa af stað frá yfir-

vofandi vá eða byssukúlum óvinarins, nú átti ég að fara upp á þak og

hann myndi halda í hestinn, ég átti að hitta á bak, hann myndi slá í

hestinn og ég þeysa á stað, alveg eins og bíómyndinni, mér leist nú

ekki of vel á þetta, skil það nú ekki, þar sem ég var yfirleitt til í allt,

svo úr varð að ég fór upp á efri hæðina og út í glugga og þaðan skyldi

stokkið á hestinn, síðan var allt gert klárt, ég miðaði út hestinn og lét

mig síðan vaða, bróðir minn sló í hestinn, hann prjónaði og þeysti af

stað, ég lenti aftast á honum, þar sem rauk af stað of snemma, ég greip

í taglið og hélt fast,  sveiflaðist einhverja metra út í loftið og lenti

síðan frekar illa rispaður og marinn, og að sjálfsögðu með brotna löpp,

þá var ekkert annað að gera en að gera Gunnu gömlu klára og keyra

stráknum á Húsavík og fá Daníel lækni til gera löppina klára fyrir

næsta ævintýri.

Athugasemdir

[Ásdís Sigurðardóttir, 28.4.2007 kl. 01:07]

Gaman að sjá þig nefna Daníel. Hann bjargaði lífi mínu. Ég var alltaf mjög veik sem barn og hann sendi mig fyrst suður 6 ára og doksarnir á Landssp. sögðu að þetta mundi eldast af mér. Hann gafst ekki upp og svo lokst þegar ég var 13 ára var kominn nýlærður læknir frá London sem sá hvað var að mér og var ég send í hjartaaðgerð til London sumarið 1969 og bjargaði það lífi mínu. Takk fyrir gott blogg

[Hallgrímur Óli Helgason, 28.4.2007 kl. 01:10]

já Daníel var góður læknir, ég man svo vel eftir honum, enda fór ég oft til hans, held að hann hafi hætt  á Húsavík um 1969

[Ásthildur Cesil Þórðardóttir, 28.4.2007 kl. 10:38]

Var þetta sami fóturinn sem brotnaði þarna.  Þú hefur nú verið meiri karlinn Hallgrímur. 

[Hallgrímur Óli Helgason, 28.4.2007 kl. 11:09]

já þetta var sami fóturinn, brotnaði oft í æsku amk. tólf sinnum, t.d. handar, fingur, ristar, tá, fingur og hælbrotnað, en aldrei á vinstri fæti.

[Ester Sveinbjarnardóttir, 28.4.2007 kl. 23:50]

Þið Bergsteinn hafið verið meiru prakkararnir, ég hefði ekki viljað vera í sporum foreldar ykkar. 

[Hallgrímur Óli Helgason, 28.4.2007 kl. 23:56]

já við vorum miklir prakkarar við bræðurnir, í þessari sögu er það elsti bróðir minn sem heldur í hestinn, hann er sjö árum eldri en ég og heitir Ingólfur og er bóndi í Borgarfirði